نداءات استغاثة أطلقها طلاب المدارس والمهنيات أمس عبر مواقع التواصل الاجتماعي. #العطلة_حق_للكل ، #وينك_بو_صعب ، وسوم عبّرت عن "صرخة برد" من طلاب لبنان الى وزير التربية الجديد مروان حمادة بعد قراره إقفال المدارس والمهنيات الواقعة على ارتفاع 700 متر وما فوق بسبب العاصفة. الطلاب الذين استحضروا النكات الطريفة، طالبوا بـ"المساواة بالعطلة"، وقال أمير محمد: "الطالب يلي عال 700 ما بيفرق عن الطالب يلي عال 300 #العطلة_حق_للكل..."، أما جاد أبو زكي فكتب: "لي فوق ال٧٠٠ متر بعطل و لي تحت ال٦٩٩ بيسبح #العطلة_حق_للكل". من جهتها نور الهدى كتبت: "#عطلة للمدارس بمناطق عالية 700 م عن سطح البحر ... اتسوكيييي طيب شو بالنسبة للمناطق يلي صار #البحر عندن ؟! يتساءل أهل #الضاحية_الجنوبية معاليك #العطلة_حق_للكل".

الطلاب تناقلوا قصيدة لوزير التربية السابق الياس بو صعب الذي عرف عنه اقفاله للمدارس في أيام العاصفة:

#العطلة_حق_للكل
الحالة صعبة يا بو صعب
وينك حتى تَعَطِّلْنا
الوضع برا صاير صعب
حتى نحنا تَعَطَّلنا
هوا شرق وهوا غرب
متل البوظة تجمدنا
والشتى داير ع الدرب
من أولتا تبلبلنا
رايح ع الدرس بالغصب
لا فهمنا ولا تعلمنا
صارت عندي القسمة ضرب
وبدل الجمع نقصنا
وتعلمنا كيف نسبّ

والاستاذ يشاركنا
يرحم أيامك بو صعب
لما كنت تدللنا
كل ما شوي الهوا هب
بالبيوت تقعدنا
وهلق لو الشتى كب
الوزير ما بعطِّلنا
وهوّر يا بو الهوَّارة الدنيا برا مطَّارة
#نحنا_كمان_طلاب #نطالب_بالمساواة #طلاب_الساحل